​30 қаңтар - Ғылыми конференция

30 қаңтар – Мәлік Ғабдуллинге Кеңес Одағының батыры атағы берілген күнге орай Батыр музейінің ұйымдастыруымен бірқатар іс-шаралар өтеді.

Атап айтар болсақ, сағат 11.00-де М.Ғабдуллин музейінде «Жас ұлан» әскери-патриоттық клубына жаңа мүшелер қабылдау, Батыр ескерткішіне гүл шоқтарын қою рәсімдерінен басталған іс-шара, сағат 15.00-де Ш.Уәлиханов атындағы Көкшетау мемлекеттік университетінің салтанат залында «Батырлар жырының эпикалық құрылымы мен тәрбиелік маңызы» атты ғылыми конференциямен жалғасады. М.Ғабдуллиннің ата-бабалары Қанай Құттымбетұлы, Итқара Қанайұлының ерлік істерін дәріптеу, ата-бабаларымыздың батырлық рухын насихаттау бағытындағы іс-шара барысында «Мұхтар Әуезов пен Мәлік Ғабдуллиннің ауыз әдебиеті мұраларын зерттеу жөніндегі тәжірибесі», «Батырлар жырындағы салт-дәстүр мен әдет-ғұрыптардың көрініс табуы және танымдық сипаттаулар», «Қанай би және оның ұрпақтары», «Итқара батыр» атты тақырыптарда баяндамалар жасалады.

Сонымен қатар, дизайнерлердің Еуразиялық одағы мүшесі Т.Әкімовтың «Итқара батыр» атты туындысының тұсаукесерін, Батыр ұрпақтарының арнайы экспедициясының сапарнамалық баяндамасын тамашалай аласыздар.

Жылда дәстүрлі түрде мұндай іс-шараларды ұйымдастырудағы мақсатымыз – қалың жұртшылыққа Ұлы дала елінің мемлекеттік негіздері туралы мағлұматтар беру; «Мәңгілік ел» идеясының қадір-қасиетін арттыру; ерлігі мен еңбегі барша халыққа үлгі болған Мәлік Ғабдуллиннің ата-тек шежіресін тарата отырып, генетикалық сабақтастықты зерделеу. Қазақ елінің Тәуелсіздігін қорғайтын отаншыл тұлғалар тәрбиелеуге ықпал жасау.

Келемін деушілерге есігіміз айқара ашық!